★50 हजार रुपयांसाठी छळ, पतीला जन्मठेप, बीडमधील प्रकार
बीड | प्रतिनिधी
पत्नीचा खून करणाऱ्या पतीला बीडच्या जिल्हा व सत्र न्यायालयाने जन्मठेपेची शिक्षा सुनावली. जिल्हा व सत्र न्यायालयाचे अतिरिक्त चौथे न्या. आर. एस. पाटील यांनी हा निकाल दिल्याची माहिती सहायक सरकारी वकील मंजूषा दराडे यांनी दिली. शिवाजी महादेव फाटक (रा. जेवापिंप्री, ता.जि. बीड) असे शिक्षा सुनावलेल्या आरोपीचे नाव आहे.
याप्रकरणी प्रभा रमेश बोरकर यांनी नेकनूर यांनी पोलिस ठाण्यात तक्रार दिली होती. यात म्हटले आहे की, त्यांची मोठी मुलगी सुरेखा हिचा विवाह जेवापिंप्री येथील शिवाजी फाटकसोबत झाला होता. लग्नानंतर १५ दिवसांनी नवरा शिवाजी, सासरा महादेव फाटक, सासू द्वारकाबाई, नणंद सीमा यांनी टेलरिंगचे दुकान टाकण्यासाठी माहेरहून ५० हजार रुपये घेऊन ये म्हणत छळ करण्यास सुरुवात केली. त्यानंतर २५ ऑक्टोबर २००२ रोजी शिवाजीने पत्नीवर गुप्तीने वार करत तिचा खून केला.याप्रकरणी पोलिस उपनिरीक्षक एम.आर.गरुड यांनी तपास करून जिल्हा व सत्र न्यायालयात दोषारोपपत्र दाखल केले होते. गुन्हा करून आरोपी फरार होता. या प्रकरणात सरकार पक्षातर्फे सहायक सरकारी वकील मंजूषा एम. दराडे यांनी बाजू मांडली. त्यांना सरकारी वकील बी. एस. राव, अॅड अजय तांदळे यांनी सहकार्य केले.
★12 साक्षीदार तपासले
सरकार पक्षातर्फे प्रकरणात एकूण १२ साक्षीदार तपासण्यात आले. सरकार पक्षाने सादर केलेल्या पुराव्याआधारे व सहायक सरकारी वकील मंजूषा दराडे यांनी केलेल्या युक्तिवादामुळे बीड येथील चौथे अतिरिक्त जिल्हा व सत्र न्यायाधीश आर.एस.पाटील यांनी आरोपी शिवाजी महादेव फाटक यास जन्मठेपेची शिक्षा सुनावली.