★डोंगरकिन्ही आरोग्य केंद्राचा कारभार सातत्याने चांगला पण शासनाकडून सुविधा अपुऱ्या !
★रुग्णवाहिका, अद्यावत ट्रॉमाकेअरचीही अनेक दिवसांपासून नागरिकांची मागणी
कुसळंब | प्रतिनिधी
डोंगरकिन्ही प्राथमिक आरोग्य केंद्राचा विस्तार अर्ध्या पाटोदा तालुक्यात आहे. तालुक्याचे गाव असलेल्या पाटोदासह, डोंगरकिन्ही, तांबाराजुरी, घुमरापारगाव व महासांगवी आरोग्य उपकेंद्र डोंगरकिन्ही प्राथमिक आरोग्य केंद्रांतर्गत येतात. एवढा मोठा विस्तार असल्याने प्रशासकीय कामासाठी आधीच डोकेदुखी, त्यासोबतच डोंगरकिन्ही परिसरात होणाऱ्या अपघातग्रस्त रुग्णांची संख्याही मोठी आहे. त्यातच रिक्त पदाची समस्या. सध्या डोंगरकिन्ही प्राथमिक केंद्रात, सर्व उपकेंद्रासह पाच शिपाई, तीन आरोग्य सेविका, दोन आरोग्य सेवक व एक समुदाय आरोग्य अधिकारी एवढी पदे रिक्त आहेत.
जागृक नागरिक व कर्मचाऱ्यांमुळे डोंगरकिन्ही आरोग्य केंद्राचा कारभार सातत्याने चांगला राहीला आहे. विशेष करून कोविड सारख्या समस्येच्या काळात व इतर वेळीही औषधी, व इतर सुविधा उपलब्ध होण्यासाठी सरपंच, रुग्ण कल्याण समिती नेहमी पाठपुरावा करतात. बहुतेक ठिकाणी कर्मचारी मुख्यालयाच्या ठिकाणी राहणाचे टाळतात. येथे कर्मचारी ठिकाण्यावर आहेत तर राहण्यासाठीची निवासस्थाने धोकादायक अवस्थेत आहेत. पस्तीस-चाळीस वर्षांपूर्वी बांधलेली ही निवासस्थाने वास्तव्यासाठी धोकादायक झाली आहेत. काही ठिकाणी तर भिंतीवर व छतावर वनस्पती उगवल्या आहेत. नवीन निवासस्थानाच्या बांधकामासाठी निविदा प्रक्रिया सुरु असुन भाजपा तालुकाध्यक्ष भागवत येवले व अनिल काथवटे हे आ. सुरेश धस यांच्या माध्यमातून पाठपुरावा करत आहेत.
डोंगरकिन्ही गावातून दोन राष्ट्रीय महामार्ग जातात. या महामार्गावर धोकादायक वळणे असल्याने नेहमीच अपघात होतात. डोंगरकिन्ही प्राथमिक आरोग्य केंद्रात रुग्णवाहिका उपलब्ध नसल्याने बऱ्याच वेळा अंमळनेरहुन रुग्णवाहिका येईपर्यंत रुग्णाची परिस्थिती गंभीर होते. यामुळे रुग्णवाहिकेसह, क्ष-किरण, ईसीजी व इतर अद्यावत वैद्यकीय सुविधा उपलब्ध असलेले ट्रॉमाकेअर डोंगरकिन्ही येथे व्हावे अशी मागणी अनेक वर्षांपासून नागरिक करत आहेत.
★अद्यावत ट्रॉमाकेअर युनिट व्हावे
डोंगरकिन्ही दोन राष्ट्रीय महामार्गावर असल्याने नेहमीच परिसरात रस्तेअपघात होतात. त्यामुळे येथे अद्यावत ट्रॉमाकेअर युनिट व्हावे अशी मागणी भाजपाकडून करण्यात आली आहे. त्यासाठी पाठपुरावा सुरू आहे. अशी माहिती देण्यात आली आहे..
★नविन निवासस्थान बांधकामाची ई-टेडर प्रक्रिया
डोंगरकिन्ही येथील प्राथमिक आरोग्य केंद्रातील कर्मचारी निवासस्थान वास्तव्यास धोकादायक असुन ते पाडण्यासाठीचा प्रस्ताव अधिक्षक अभियंता, औरंगाबाद यांच्याकडे पाठवला आहे. नविन निवासस्थान बांधकामाची ई-टेडर प्रक्रिया त्यानंतर सुरू होईल.
– नंदकुमार वाघ
कनिष्ठ अभियंता, जि. प. बांधकाम विभाग, बीड.