★एक नंबरच्या डब्यात आढळले 26 प्राचीन अलंकार
★प्राचीन व मौल्यवान अलंकाराचा छडा लावण्यासाठी पुन्हा अलंकारांची मोजणी
तुळजापूर | प्रतिनिधी
तुळजाभवानी मातेच्या गहाळ झालेल्या प्राचीन व मौल्यवान अलंकाराचा छडा लावण्यासाठी पुन्हा अलंकारांची मोजणी बुधवारी (दि.26) नव्याने सुरू करण्यात आली आहे. बुधवारी एक नंबरच्या डब्यातील अलंकाराची मोजणी करण्यात आली. यात 1 नंबर डब्यात 26 प्राचीन मौल्यवान अलंकार आढळले. यात दोन अलंकार 1994 नंतरचे आहेत. या वेळी 1975 च्या फोटो अल्बमची मदत घेण्यात आली. दर्शन मंडपातील मोजणी कक्षात सकाळी 11 वाजता प्रत्यक्ष मोजणीला प्रारंभ करण्यात आला. सीसीटीव्ही कॅमेऱ्याच्या निगराणीत दुपारी 3 च्या सुमारास 1 नंबर डब्यातील अलंकाराची मोजणी संपली. यानंतर मोजणीचा अहवाल सादर करण्यात आला. दररोज मोजणी अहवाल सादर करण्याचे समितीला बंधनकारक करण्यात आले आहे. दरम्यान, या वेळी मोजणीसाठी 1975 – 76 च्या अलंकाराचा फोटो अल्बमची मदत घेण्यात आली.1963 च्या रजिस्टरमधील नोंद, 2012, 2018 च्या रजिस्टरमधील नोंद व सद्य:स्थितीत असलेले अलंकार याप्रमाणे अलंकाराचे वर्गीकरण करण्यात येत आहे. या वेळी उमरग्याचे उपविभागीय अधिकारी गणेश पवार, नायब तहसीलदार अमित भारती आदींची उपस्थिती होती.
★अलंकारांचे एकूण 7 डबे, 7 दिवस मोजणी चालणार
तुळजाभवानी मातेच्या प्राचीन व मौल्यवान अलंकाराचे एकूण 7 डबे आहेत. यामध्ये शिवकालीन अलंकाराचा समावेश आहे. दीपावली पाडवा, दसरा, गुढीपाडवा, रथसप्तमी, अक्षय तृतीया आदी सन-उत्सवाला तुळजाभवानी मातेची विशेष अलंकार पूजा मांडली जाते. या वेळी हे अलंकार मातेला घातले जातात. अलंकारांचे 7 डबे असून डब्याची मोजणी 7 दिवस चालणार आहे.